Make your own free website on Tripod.com

راجــــي التوبه

 

 

على صوت المآذن والاذان وزحمة ذنوبي
تغافلت الخطايا العوج وبعت الذنب للتوبه


تثاوب للخطا صوت وتنحنح اول عيوبي
عرفت اني الى ربي قريب ومتجـــه صوبـه


شعرت بقشعريره وارتعشت ولجت جنوبي
 بعدها ماشعــــرت الا وانا غــارق بغيبوبــه


تخيلت الذنوب اللي توثب تتجه صوبي
 وانا العبــد الفقير اللي يضيق بكثرة ذنوبــه


تخيلت القيامه والعذاب وضقت من ثوبي
 تخيلت المعاصي السـود وضـاق القلب بجنوبه


ذكرت القارعه والزلزله وآنا ومكتوبي
وذكرت ان اصغر ذنوبي معي في لوح مكتوبه


من اول وحشة القبر الصغير فـ اول دروبي
الى حـــــد الصراط المستقيــم وآخر دروبـــه


انا دوبي وصلت من الغياهب والدجى دوبي
 وقلبي تــو نــزع عنه ازارير الخطــا دوبه


مع صوت المؤذن بالآذان وزحمة ذنوبي
 لعنت ابليس باربي وجيتــك راجــــي التوبه